Dawaaf
Caruurnimo dareenkii
Yartii dariska iga galay
Dugsigiyo quraankii
Yartaan uga dibjiray een
Sida hoos u daba galay
Dala’siiyahaa qabin
Oo duruusta barashiyo
Imtixaan diyaarsaday
Xusuus igu dhex duugnayd
Midabkeedii dahabkiyo
Saw iguma soo dagin
Dabarkii ilkaha iyo
Dabacsani u socodkii
Damaq li’i u hadalkii
Daganaanta lagu ladhay
Dib umaana daalacan
Anigiyo darmaantii
Dookhayga noqotoo
Durdur iyo xareediyo
Dhulkoo doogu uu simay
Damaashaadna lagu jiro
Geed damala hoostii
Sheeko daadihinaynoo
Taariikho duugiyo
Wakhtigii na kala diray
Damaqii uu beeriyo
Duruuftii adkaydee
Midba dunida soo maray
Diifteedi reebnoo
Ka dawownay gocashoo
Caashaqu daruurtiyo
Dayaxaba na dhaafshoo
Samadaa dusheena ah
Ku dakaynay maalmoo
Xidigaha dawaafnoo
Dunidani idaylkeed
Dusha kaga wareegnoo
Meel dira diraaliyo
Xaasid aanu dagi karin
Haasaawe dooriyo
Kaftan maanu daadihin
Anoo dadab galkaygiyo
Arooskii diyaarshoo
Midii aan ku daabacay
Dubaaqa iyo jiidhkeen
Laabta daarta uga dhigay
Ee aan dumarba kala baxay
Halkaan dagi lahayn iyo
U diyaarshay hoygii
Rag doorana warkaygii
Dagdag aan u siiyoo
Loowada diyaar yahay
In la ii durbaan tumo
Waagu saw ma daalicin
Hareeraha markaan dayay
Darmo qudha anoo kali
Baaxaa dagaayoo
Barkimada dugsanayuun
Dareen li’i masoo kicin!
Waxay laabtu doontiyo
Riyo ila dawaaftaa
Jacayl uu dabkiisiyo
Nuurkiisi damayoo
Aan duugay waa hore
Doogtiisa kicisee
Marna maana doonayn
Nabaryohow damqanayaa
Inaan qolofta diiree
Naftaa igu dirqiyaysoo
Calafkeedan daahaa
Daldalooladeediyo
Caashaqii dabayshaday
Hadba dib u xusaysee
Qalbiyohow dareen li’i
Danahaaga bogo oo
Dayacii kusoo maray
Diiwaanka galiyoo
Taariikhda daabacan
Cashir aan ku diirsado
Oo dakharadaadii
Dib u saxa ka qaadoo
Durba nolosha guud iyo
U dhis dayrka guulaha.
